కాశీ దర్శన్

ఈ భూమండలం మీద భక్తులకి మోక్షాన్ని ప్రసాదించే ఏడు ప్రాంతాలు ఉన్నాయి. వాటిని సప్తపురాలు అంటారు. అవి అయోధ్య, మధుర, హరిద్వార్, కాశీ, కంచి, ఉజ్జయిని, ద్వారకలు. 

ఈ సప్తపురాల్లో ఒకటైన కాశీకి వెళ్ళాను. అక్కడ మూడు రోజులు ఉన్నాను. వాసవీ గంగా గోదావరి సేవా సంస్థలో స్టే చేశాను.

గంగా స్నానం చేసి, ద్వాదశ జ్యోతిర్లింగాలలో ఒకటైన కాశీ విశ్వనాధ మందిరం, అన్నపూర్ణా మాత, అష్టాదశ శక్తి పీఠాల్లో ఒకటైన విశాలాక్షి అమ్మవార్ని.. దర్శించుకొన్నాను.

ముఖ్యమైన దేవాలయాలు..

సంకట్ మోచన్ హనుమాన్

దుర్గా మాత

మృత్యుంజయ్ మహాదేవ్ 

కాలభైరవ

తులసీ మానస్ మందిర్

న్యూ విశ్వనాధ మందిర్

కౌడి మాత 

గౌరీ కేదారేశ్వర్

వ్యాస కాశీ...లను దర్శనం చేసుకొన్నాను. 

దశాశ్వమేధ్ ఘాట్ దగ్గర గంగా హారతి చూశాను.

గంగానదిలో బోటు మీద వెళ్ళి ముఖ్యమైన ఘాట్లను చూశాను. కొత్తగా కట్టిన విశ్వనాధ కారిడార్లో విద్యుత్ దీపాల వెలుగుల మధ్య కొంత సమయం గడిపాను. అక్కడి నుంచే మణికర్నికా ఘాట్‌లో జరుగుతున్న శవ దహనాలను కూడా చూశాను.

కాశీ ఇరుకు గల్లీల్లో ఉదయం, మద్యాహ్నం, రాత్రి తిరిగాను. లోకల్ షాపింగ్ - బెనారసి సిల్క్ - చేసాను. 

నేను చూసినవి వీలైనంతమటుకు వీడియోలుగా చేశాను. నా యూట్యూబ్ చానల్లో కాశీ దర్శన్ (Click this link to watch those videos) పేరుతో ప్లే లిస్ట్‌లో పెట్టాను. ఆ వీడియోలు కాశీ వెళ్ళాలని అనుకొనేవారికి మార్గదర్శకంగా ఉంటాయని అనుకొంటున్నాను. 

హరహర మహాదేవ శంభో శంకర!

ఇంకా బ్లాగ్స్ చదువుతున్న వారు ఎవరైనా ఉన్నారా?

నిన్న ఒకాయన, 'మీ బ్లాగ్ చూశానండి. ఒక్కొక్క పోస్టూ చదువుతూ వెళుతున్నాను. రాయడం మనేయకుండా కొనసాగిస్తుంటే బాగుండేది,' అని చెప్పారు. 

నా దృష్టి బ్లాగ్ వైపు తిరిగింది. ఎందుకు రాయడంలేదో అని ఆలోచిస్తే కొన్ని కారణాలు కనిపించాయి. 

1. ఒక బ్లాగ్ పోస్ట్ రాసిన తరువాత సంవత్సరానికి కూడా వెయ్యి వ్యూస్ రావు. అదే యూట్యూబ్, ఫేస్‌బుక్, ఇన్‌స్టాగ్రాముల్లో ఏ వీడియోకైనా లక్షల వ్యూస్ ఉంటాయి. జనాల్లో చదవడం అలవాటు పోయి, చూడడం అలవాటు ఎక్కువయ్యింది.

2. పెర్సనల్ బ్లాగ్  మనం రాసుకొన్న నోట్‌బుక్ లాంటిదయితే, ఇతర సోషల్ నెట్‌వర్కింగ్ సైట్లు జనసమ్మర్ధం ఉన్న రోడ్డులో స్వీట్ షాపుల్లాంటివి. అందుకే కొంతమంది బ్లాగ్‌లు మానేసి నేరుగా వాళ్ళ ఫేస్‌బుక్ వాల్ మీద రాసుకొంటున్నారు. స్పందన బాగుంటుంది. నిజమైన రచ్చబండలోలాగ వాదప్రతివాదాలు, చమత్కారాలు, రుసరుసలూ, మెచ్చుకోళ్ళూ జోరుగా జరుగుతున్నాయి. 

3. ఎందుకో బ్లాగ్‌లోకి వస్తే లోన్లీగా అనిపిస్తుంది. అంతరించిపోతున్న తెగలో  చివరకు మిగిలిన వాళ్ళకు ఇలాంటి ఫీలింగే ఉంటుందేమో! జనాలకి చేరువచేసే బ్లాగర్ ఆగ్రిగేటర్‌లు కనుమరుగైపోయాయి. ప్రత్యేకంగా బ్లాగ్‌లోకి వచ్చి చూస్తేనే గానీ మనం రాసింది ఎవరికీ కనపడదు. అందుకే ఇప్పటికీ బ్లాగ్‌లో రాసే వాళ్ళు పాఠకుల కోసం కాదు, తమకోసమే రాసుకొంటున్నారేమో అనుకొంటున్నాను. ఈ పరిస్థితి మారి బ్లాగింగ్‌కి పూర్వ వైభవం రావాలటే బ్లాగర్ ఇంటర్‌ఫేస్ మారాలి. మన బ్లాగ్ ఎకౌంట్ నుంచి నచ్చిన బ్లాగ్స్‌ని లైక్ చేసుకొంటే మన టైంలైన్‌లోకి వాళ్ళు రాసింది వచ్చేసేలా ఉండాలి. మనం రాస్తూ పోవడమే కాదు, మన బ్లాగర్ ఫ్రెండ్స్ రాసింది చదవగలిగి కూడా ఉండాలి. అప్పుడు ఇది కూడా ఫేస్‌బుక్కే ఐపోతుంది కదా అని మీరు అనవచ్చు. కానీ యూట్యూబ్‌ని చూసి ఫేస్‌బుక్ వాడు షార్ట్ వీడియో అప్లోడ్ చెయ్యడానికి ఏనేబుల్‌చేస్తే - ఇప్పుడది యూట్యూబ్‌కి గట్టి పోటీ ఇస్తుంది.

4. బ్లాగ్ రాయకపోవడానికి పై మూడూ కాకుండా ఇంకొక కారణం ఉంది. అది.. అశ్రద్ధ!

ఈ టపాకి ట్యాగ్‌లైన్ ఏమిటంటే...

నేను రాయగలను అనే నమ్మకాన్ని ఇచ్చిన బ్లాగ్ అంటే ఇష్టం ఎక్కువ.  ఎప్పుడైనా  నా బ్లాగ్ చదివి ఎవరైనా ఒక మాట చెపితే, బ్లాగ్‌లు మంచిగా నడచిన బంగారు రోజులు గుర్తుకువచ్చి 'అయ్యో' అనిపిస్తుంది.

చూద్దాం ఇంకా బ్లాగ్స్ చదువుతున్న వారు ఎవరైనా ఉన్నారా? అని.

సీతారామం

ఈ మధ్య కాలంలో(పది - పదిహేనేళ్ళ నుంచి) సినిమాలు చూసే ఆసక్తి బాగా తగ్గిపోయింది. వారానికి మూడు, నాలుగు సినిమాలు చూసే నేను ఈ దశాబ్ద కాలంలో మొత్తం అరడజను కూడా చూడలేదంటే సినిమా మాధ్యమం నాకు ఎంత బోర్ కొట్టేసిందో అర్ధం చేసుకోవచ్చు. కానీ, ఇప్పుడిప్పుడే మళ్ళీ మనసు అటువైపుకు లాగుతుంది. మూస ఫార్ములా ఒదిలిపెట్టి, మంచి కంటెంట్ వైపు తెలుగు సినిమా అడుగులు వేస్తున్నట్టు అనిపిస్తుంది. 

కశ్మీర్ బ్యాక్‌డ్రాప్‌లో తీసిన సినిమా అనగానే 'రోజా'లా ఉండొచ్చేమో అని ఆశ కలిగింది. 'యుద్ధంతో రాసిన ప్రేమ కథ ' అనే ట్యాగ్ లైన్, ఉత్తరాల కాలంనాటి పిరియాడిక్ స్టోరీ, రివ్యూస్... ఇవన్నీ నన్ను థియేటర్‌కి నడిపించిన  కారణాలు.

ఎక్కడా లూజ్ ఎండ్స్ లేకుండా చక్కగా రాసుకొన్న కథ చాలా బాగుంది. రాముడు రాసిన ఉత్తరం సీతకు చేర్చే క్రమంలో రశ్మిక ఫ్లాస్‌బ్యాక్‌లలో తెలుసుకొనే స్ర్కీన్‌ప్లే 'మహానటి ' ని జ్ఞాపకం చేస్తుంది. ఇంకా హీరోయిన్ రాసే ఉత్తరాలు యండమూరి 'వెన్నెల్లో ఆడపిల్ల ' నవలని, కొన్ని సన్నివేశాలు వెంకటేష్ మల్లీశ్వరిని, ఒక్కొక్కచోట రోజాని.. గుర్తు చేస్తాయి. అయినా ఈ సినిమాని తప్పుపట్టలేం! 

ఇంటర్వెల్‌కి ముందు హీరోయిన్ ఎవరో రివీల్ చెయ్యడం, పోస్ట్‌మ్యాన్ లాగ ఉత్తరం పట్టుకొని తిరుగుతున్న రశ్మిక్‌కి మెయిన్ క్యారెక్టర్‌కి ఉన్న సంబంధాన్ని ప్రి క్లైమాక్స్‌లో ఎస్టాబ్లిష్ చెయ్యడం చాలా బాగుంది.

ప్రతీ ఫ్రేం నీట్‌గా ఉంది. ఫొటోగ్రఫీ,  కంపోజింగ్,  లొకేషన్, కస్ట్యూంస్, నటీనటులు.. అన్నీ కలిసి బ్యూటిఫుల్ ఔట్‌పుట్ వచ్చింది. బ్యాగ్‌గ్రౌండ్ మ్యూజిక్ బాగుంది. పాటలు ఎప్పుడు వచ్చి, వెళ్ళాయో తెలియలేదు. 

సీతారాముల్ని కలిపితే కథ అర్థవంతం అయ్యుండేది. ముగింపు కొంచం మార్చడం వల్ల సినిమాకి ఇంకా ప్లస్ అయ్యుండేదేమో!

మంచి నవల చదివిన అనుభూతి కలిగింది. సీతారామం చూడవలసిన మంచి సినిమా.